టీచర్ గా ఆదాయం చాలక క్లౌడ్ కిచెన్ తెరిచింది... ఇప్పుడు డబ్బే డబ్బు!

వారణాసికి చెందిన ఓ మహిళా టీచర్ సాధించిన విజయం ఇప్పుడు సోషల్ మీడియాలో ఎంతో స్ఫూర్తినిస్తోంది. ట్యూషన్లు చెబుతూ నెలకు కేవలం రూ.9 వేలు సంపాదించే ఆమె, ఇప్పుడు క్లౌడ్ కిచెన్ వ్యాపారంతో నెలకు రూ.1.25 లక్షలకు పైగా టర్నోవర్ సాధిస్తున్నారు. అన్ని ఖర్చులు పోగా నెలకు సుమారు రూ.60,000 ఆదా చేస్తూ అందరికీ ఆదర్శంగా నిలుస్తున్నారు.

వారణాసిలో సొంతంగా జీవిస్తున్న ఈ మహిళ, రోజుకు నాలుగు నుంచి ఐదు గంటలు ట్యూషన్లు చెప్పినా వచ్చే డబ్బు ఇంటి అద్దె, ఇతర ఖర్చులకు సరిపోయేది కాదు. ఆర్థిక ఇబ్బందులతో కొన్నిసార్లు తండ్రి సహాయం తీసుకునేవారని ఆమె స్నేహితుడు అంకిత్ పాండే సోషల్ మీడియాలో పోస్ట్ చేశారు. ఈ క్రమంలోనే అంకిత్ ఆమెకు ఓ విలువైన సలహా ఇచ్చారు. "సమయాన్ని అమ్మి డబ్బు సంపాదించడం ఆపి, నీ వంట నైపుణ్యాన్ని వ్యాపారంగా మార్చుకో" అని ప్రోత్సహించారు.

స్నేహితుడి సలహాతో ఆమె తన దగ్గరున్న రూ.30 వేలు, అంకిత్ ఇచ్చిన రూ.20 వేలతో కలిపి మొత్తం రూ.50 వేల పెట్టుబడితో క్లౌడ్ కిచెన్ ప్రారంభించారు. జొమాటో, స్విగ్గీ వంటి యాప్‌లలో వ్యాపారాన్ని నమోదు చేశారు. మొదట్లో ఒక్క ఆర్డర్ కూడా రాని రోజులున్నా పట్టు వదలకుండా నాణ్యమైన ఆహారాన్ని అందించడంపైనే దృష్టి పెట్టారు. క్రమంగా రుచి, సరైన ధరల వల్ల కస్టమర్ల నుంచి మంచి స్పందన వచ్చింది.

ప్రస్తుతం ఆమె రోజుకు 15-20 ఆర్డర్లు అందుకుంటున్నారు. వ్యాపారం పెరగడంతో ఓ చెఫ్‌ను కూడా నియమించుకున్నారు. చెఫ్ జీతం, అద్దె, ప్యాకేజింగ్ ఖర్చులు పోను ఆమెకు నెలకు రూ.60,000 వరకు మిగులుతోంది. భవిష్యత్తులో ఈ వ్యాపారాన్ని మరింత విస్తరించే ఆలోచనలో ఉన్నట్లు తెలుస్తోంది. నైపుణ్యం ఉంటే స్వయం ఉపాధిలో ఎంతగా రాణించవచ్చో ఈమె కథ నిరూపిస్తోందని నెటిజన్లు ప్రశంసిస్తున్నారు.